Багацце беларускай мовы
“І кожны народ стварыў
хоць бы геніяльны твор,
i твор гэты - мова”
(Алесь Разанаў)
Правядзенне тыдня беларускай мовы і літаратуры ў нашай школе — шматгадовая традыцыя. Галоўная мэта мерапрыемства — папулярызацыя беларускай мовы і літаратуры, развіццё камунікатыўнай культуры і творчых здольнасцей навучэнцаў, якія ў ходзе таго ці іншага мерапрыемства самарэалізуюцца, самавыяўляюцца, самасцвярджаюцца, растуць духоўна.
19 верасня дзень пачаўся з урачыстага аб’яўлення акцыі “Гавары са мной па-беларуску”. Вучні 11-х класаў пасля першага ўрока павіншавалі ўсіх са святам і нагадалі, што ў школе праводзіцца акцыя “Гавары са мной па-беларуску”, прапаноўвалі ўсім папрактыкавацца ў перакладзе слоў з рускай мовы на беларускую, прачытаць вершы на роднай мове, скласці фразеалагізмы з прапанаванымі словамі, назваць 10 слоў па-беларуску. За кожнае выкананае заданне ўдзельнікі акцыі атрымлівалі салодкія пачастункі.
Вучні з задавальненнем прынялі ўдзел у марафоне “Мова родная-мова модная”. Можна было на любым перапынку паслухаць цудоўныя эстрадныя песні на беларускай мове, паспяваць самім народныя песні.
Працягам дня стала стварэнне інтэрактыўнага воблака “Маё любімае слова па-беларуску”. Цікавым і запамінальным выдаўся гэты дзень не толькі для навучэнцаў школы, але і для настаўнікаў. Яны таксама актыўна прымалі ўдзел у стварэнні інтэрактыўнага воблака. Сярод любімых беларускіх слоў самымі папулярнымі былі жыццё, каханне, матуля,сям’я, Радзіма, кветкі, Беларусь, мова, сонейка.
Гэты дзень стаў адметным у нашым будзённым жыцці. Моўнае свята, арганізаванае вучнямі і настаўнікамі, прынесла сапраўднае задавальненне, яшчэ раз пацвердзіла, што мова беларуская наша родная, цудоўная, мілагучная, самая свая, неабходная.